Tampa Mandi Aer Panas Kelewaha yang so tabiar

Peninjauan Pemerhati Budaya Minaesa

Kalu mo maso ka Kampung Lobu Kecamatan Touluaan Kab. Minahasa Tenggara dari arah Amurang <Minsel>, pasti mo dapa lia tu tampa mandi yang ada di sei jalang, yang orang kenal dengan nama Tampa Mandi Aer Panas Kelewaha. Ini tampa cuma salah satu tampa mandi yang ada di kobong kelewaha, karna dibagean atas ada lei tampa mandi aer panas, cuma nda diperhatikan oleh pemerintah sampe terkesan cuma tampa mandi biasa saja versi Orang kobong...hehehehe...!!! mar kenyataan so bagitu.

Tampa Mandi ini yang ada di sei jalang raya adalah tampa dari masyarakat lobu ja pake for mandi dengan bacuci baju, adalei tu orang diluar Lobu yang pas lewat disini kong so suka mandi, dorang juga turut menikmati sadapnya mandi aer panas di tampa ini.

Bak Mandi Air Panas Kelewaha

Menurut salah satu orang yang ada bekeng tu Bak Mandi ini yang biasa dorang ja pangge Om Yor bilang bagini "Ini tampa mandi ini dorang ada kase gaga (Da bekeng akang Bak) supaya orang-orang laeng yang diluar Desa Lobu, boleh mandi disini" dengan dia bilang bahwa menurut cirita orang-orang tua bahwa "ini tampa merupakan tampa i manga nawo" yang biasa dorang kenal tu nawo yang biasa ada disitu yaitu Nawo Selet, Mahasere, Palembatas, Makiralos dengan ada lei tu Nawo-nawo laeng.

Jembatan Kelewaha

Didekat tampa mandi ini, ada tu jembatan yang dikenal dengan nama "Jembatan Kelewaha". Ni jembatan ini so terkenal di kalangan Anak Suku Toundanouw / Tonsawang bahwa jembatan yang angker {ada panunggu}, sampe skarang kalu orang ja lewat disini so tabiasa kalu ada bawa motor atau Oto paling ja ba klatson atau ja sebermain tu lampu Dem, yang dorang percayai bahwa itu tanda ba hormat minta permisi lewat, tapi ada juga dari kalangan yang nda ja pake tu babagitu, cuma lewat tanpa kase isyarat.

Pohon yang roboh diatas Bak Mandi

Ini tampa mandi sebenarnya kalu ada jaga bae-bae, dengan pemerintah da perhatikan kong bekeng gagah, paling mo jadi tampa wisata yang berguna mo se angka nama Kabupaten, Kecamatan dan Desa, cuma dapa lia so tabiar nda ada rasa kepedulian. Kalu mo lia skarang sampe postingan ini ditulis masih ada tu kayu besar darubuh di atas bak mandi, kong dorang lei cuma kase biar. Sebenarnya pemerintah Desa kalu ada kepedulian pasti so kerja bakti di situ kong kase bersih tu tampa itu, cuma mo bilang apa lei...??? kenyataanya memang tabiar ...!!!

Resting Area yang Rusak / So Tabiar

Di Dekat tampa mandi ini ada dorang da bekeng tu Resting Area, cuma sama dengan da buang-buang doi jo...!!! bangunan nda ja urus dengan so rusak lei. Di tamba dengan jembatan yang ada disitu so dapa lia sama dengan jembatan biasa, itu depe besi-besi di sei jembatan so ilang nintau kamana ??? Jadi mo lia tu kondisi skarang so sangat memprihatinkan, nintau mo se salah pa sapa....???? Skarang tergantung pemerintah mo ator tu tampa, dengan melihat pengalaman yang ada, dengan katu bukang cuma pemerintah ..... so musti dengan masyarakat siapapun dia, so musti berperan aktif mo jaga, plihara ni tampa dengan kalu ada tu dorang mo bangun disitu jangan kase rusak, karna itu merupakan untuk kepentingan orang banyak.

Yah..... torang cuma berharap dan berdoa supaya dikemudian hari ini tampa mandi so bukang lagi jadi tampa mandi aer panas kelewaha yang so tabiar, melainkan menjadi "Objek Wisata Permandian Air Panas Kelewaha". Sama dengan dorang bilang "Mero-merotange.

Posted in: Situs Budaya